BACH

Je voue une réelle passion pour Jean-Sébastien Bach, mais jusqu'à aujourd'hui je n'avais eu aucune raison de l'évoquer dans cette colonne. Je viens d'apprendre que Bach avait consacré 4 mois de son salaire de maître de Chapelle à l'achat de vin blanc pour son mariage, entre 5000 et 100000 euros actuels, si on évalue son salaire entre 1200 et 2500 euros. Ou ses invités étaient extrêmement nombreux ou ils levaient le coude sans compter. Qui de nos jours donnerait quatre mois de salaire pour acheter du blanc de Cassis ou du Rhin pour ses noces?

Lo mai geniau de totei lei compositors de musica classica es Johan Sebastian Bach, naissut en Eisenach, regien de Turinge, dins l' Alemanha de Levant, en 1685. Sieu pas solet per lo metre promier, davant Mozart, Rameau e leis autrei. Jamai vos avieu escrich una soleta rega a prepaus de ma passien per aquèu mestierau que, umblament, contentava seis emplegaires. Tau prince li demandava de musica instrumentala, Bach escrivié de "suites" per orquestra. La paroqui Sant Tomas de Leipzig li demandava de cantatas per acompanhar lo servici domenicau luterian, Bach escrivié dimenche après dimenche de caps d'obra de l'art vocau. Bach si contentava pas d'escriure lei pus bèlas particiens de la musica europea. Aguet doas fremas e mai de vint droles. Per son promier maridatge crompet de vin blanc per l'equivalent de quatre mes de son salari. Un cercaire a destraucat (déniché) aquèu compte. Probable que lo paure Bach era mau pagat, que son patron era raspi. Probable que lo bon vin blanc era carivent mai qu'encuei. Mai se considerem que Bach duvié ganhat l'equivalent de 1200 a 2500 euros dau mes, siam renduts au totau de 5000 a 10000 euros de despensas. Lo dich vin de Rhein podié costar 10 euros dau litre. Probable que Bach avié degut crompar entre 500 e 1000 litres de vin. Autra supausicien, Bach avié 100 convidats que fagueron tres repais (lei maridatges si festejavon un parèu de jorns d'aquèu temps). Aquo vodrié dire que cadun dei convidats aurié begut un parèu de litres de blanc a cadun dei dinars e dei sopars. Duvién par aguer de dificultats de subreproduccien lei viticultors alemands d'aquèu temps emé una tala pratica (de tels clients)!

Sieu segur que meme lo Eddy Barclay, modeste musicaire mai organisator inegalat dei festassas de la Jet Set a Sant Tropé, deis ans 70 et 80, anet jamai crompar tant de vin per un de sei maridatges. Es pas Johan Sebastian Bach qu vou.

Publié avec l'aimable autorisation du journal l'Agriculteur provençal

A Dieu Siatz

Je dédie mon dernier "Rythme des Saisons" à mes parents qui m'ont transmis notre langue d'Oc et à mes deux petites-filles qui, je l'espère, sauront la parler un jour. Je remercie les gérants du journal de m'avoir fait confiance pendant 26 ans, j'adresse un amical salut aux membres de l'équipe qui m'ont bien accueilli lors de mes passages à Aix. Au revoir, chers lecteurs, et pour la dernière fois bonne année. Je souhaite bon vent à Michel Neumuller. Longue vie à "L'Agriculteur Provençal".

M'aganta lo tristum que ven lo moment de picar sus mon ordinador japonés lei promiers mots en provençau de mon darnier « Ritme dei sasons ». Fagueri lo compte, ne'n siam renduts a 1130 publicats dempuei l'auton 1983. Ai chausit d'escriure en dialeite provençau maritime varés e pas en rodanenc. Ai chausit la grafié dicha de Cucuron que simplifica la grafié dei trobadors e renonciat a la grafié mistralenca (mercegi encuei lo professor Alan Bartomieu, paire de la grafié, e Mado Brieugne, nostra ostessa, que m'an força ajudat). Encuei qu'acabi ma meisson e que vau veire corre la lebre, saludi totei aquelei qu'escrivon e legisson lo provençau qualei que sigon lo dialeite e la grafié chausits, en lei pregant de continuar.

Mon darnier Ritme dei Sasons, lo voli dedicar a mon paure paire e a ma paura maire qu'avién après l'un e l'autra lo francés a l'escola comunala, venènt d'ostaus unicament occitanofones. Mi fagueron presènt dau provençau que nomenavon « patois », lo parlar de l'ostau familiau.

Lo dedicarai tanben a mei doas felenas Monia e Leonia, nascudas en 2007 e 2009, que v'espèri parlaràn un jorn « nostra rebèla lenga d'Oc », dins lo dialeite que chausiràn. Tant sarà lo lengadocian, estènt que vivon a Montpelier.

Mercajarai lei bailes dau jornau per m'aguer fach fisança e lei membres de sa cola per son acuelh amistados. Acabarai m'un grand mercès a vosautrei legeires fidèus que m'avetz encoratjat. Sensa vosautrei auriéu jamai fach tirar tant de tèmps. Que viscon « l'Agricultor Provençau » e son « Ritme dei Sasons ». A Dieu Siatz... Que 2010 vos adugue grans e fruchs.

Publié avec l'aimable autorisation du journal l'Agriculteur provençal

LIFE

N'i a que chausísson lo camp dau bòia, n’i a d’àutrei que chausísson aqueu de sei victimas. Dempuèi lo retorn dau lop dins lo Mercantor, à pè, en camion ò en elicoptèr, degun ò quasi va saup, l’opinien publica es partida. Ieu ai chausit de defendre l’anheu còntra lo lop, la rason dau pus fòrt deu pas de lònga èstre la melhora.
Siéu estat estonat que l’Estat, emé lei sòus de l’ensèms dei contribuables, paguèsse lo programa “Life” que a per tòca d’assegurar l’estudi scientific dau lop, de faire l’informacien per lo grand public sus lo lop, sa vida e son òbra e d’ajudar lei pastres à aparar leis escabòts deis atacas dei lops, dei lobas e dei lobatons. Es pecat que 70 dau cent d’aquélei sòus servèsson à estudiar lo biais de viure deis ardas de lops, quau es lo dominaire dau grope, cu son lei sotadominaires e lei dominats. Vaudrié mièlhs que aquélei sòus servèsson à pagar de mastins dei Pireneus per ajudar lei pastres à aparar sei fedas e à crompar de cledas electrificadas.
Siéu d’aquelei que pènson qu’es pas possible de laissar sus lei mémei montanhas de lops e de motons. Es necite de chausir leis uns ò leis autres. Es fòrça ipocrita de la part de l’administracien de laissar la situacien s’enverinar en si contentant de donar una indemnitat per lei motons tuats ò nafrats e dire : “es ai pastres de s’organisar per si parar dei lops”. L’elevatge extensiu es ara lo solet biais de ganhar sa vida en montanha, si pòu pus concebre de gardar lei motons nuèch e jorn d’estiu. Per aquò faudrié de rais mai pichins per tenir luènch lei lops. Lo cost de l’operacien rendrié lo mestier impossible economicament, en despiech deis ajudas legalas.
Ai agut auvit d’ecologistas à la ràdio que disién que lei pastres èron d’incapables e de fenhants. Tant de marridum e d’ignorància me làisson candi. Avant que siguèsse tròup tard, convendrié de mesurar lei consequéncias de la desaparicien deis escabòts de nòstrei montanhas per nòstre environament. Lei motons e lei vacas mantènon lei pasturatges e particípon à la lucha còntra leis avalancas en gardant leis èrbas cortetas. Perméton à una fauna d’aucelons e d’aucelilha de s’espandir. Quora aurèm pus que de boissons e de lops sus lei montanhas, s’avisarèm qu’aurèm perdut fòrça en laissant partir d’amont pastres e escabòts.

SECAT DE SET

Dau temps que leis esquilhaires espèron la neu dins leis estaciens de l’aut-país, d’estajans dau relarg tropelenc espèron l’aiga. Òc, es verai, l’ai legit dins mon jornau quotidian. Pasmens siam en genier, un dei mes mai arrosats, teoricament, de l’an. Ailàs, la pluèia a pas tombat e de vilàs, d’ostaus recentament bastits dau costat de Plan de la Torre e de la Gàrdia-Freinet dins lei Mauras, an plus d’aiga. urosament, lei noveus Jan de Floreta n’en son pas renduts d’anar cercar l’aiga preciosa amé l’ai. Basta per élei telefonar ai pompiers que vènon liurar l’aiga à l’ostau. Polida leiçon. Es ben beu de laissar bastir de vilàs e de masatges d’en pertot… Mai à la promiera secaressa, adieu, fau faire campanejar lo tocsin.

Avant d’arnar lo sòu emé d’ostaus ò de « mobil-homes », de faire de programas immobiliers, de permetre l’aplantar dei gòlfs un pauc d’en pertot, faudrié estudiar mai seriosament lo problema de l’aiga. Va sabiatz qu’un gòlf de 18 traucs gastava tant d’aiga coma una ciutat de 10000 estajans ? Prenèm l’exemple d’un gòlf de la costiera varesa qu’es ara quasi acabat : lei promotors alemands an agut l’autorisacien de faire aqueu gòlf au mitan d’una zòna vèrda protegida, qu’a faugut desclassar dins lo POS. Lo problema de l’aiga necessària ai « greens » es estat solucionat après que lo gòlf siguèt fach… E la Comuna d’acuèlh d’aqueu gòlf volié pompar l’aiga dins lo flume vesin, ce qu’aurié fach montar la sau dins la napa freatica e arroïnat lei paisans locaus.

A faugut que la Cambra d’Agricultura e l’Administracien intervenguèsson per qu’aqueu projècte malastrós de pompatge capitèsse pas. Exemple evocator, non ?

Sensa correccien de la politica d’amainatjament actuala, lo litorau secarà de set dins dètz ans. Si pòu plus dire « après ieu lo deluvi ».

SE PARLAVIAM DAU BROSSIN?

Dau mes de decembre au mes de març, es lo temps de si congostar ambé lo delici dei delicis: lo famós brossin dei païsans de Var. Es fach de fromai de cabra ambé, eventualament, quàuquei retalhons de vièlh fromai e un iogort per que siegue mai onchós.
Dins lo topin, es necite d'apondre quàuquei culhiers d'aigardent (un pareu per cent gramas de fromai) e de mesclar tot aquò. Fau laissar aqueu mesclum un bòn mes dins lo fresc de la cròta. Quora lo brossin es fach, es puèi possible d'apondre de morselons de fromai à l'azard dei subres dei repàs familhaus. Dona un pauc de diversitat.
Mi siéu avisat en parlant ambé diferents afogats d'aquélei fromais fermentats un pauc balès qu'aqueu brossin semblava fòrça au "topinat" dei gents dau relarg gapian e briançonés. Dins aqueu topinat, n'i a que méton un pauc de vin blanc. La "cachat" ò "cacalha" deis amics dei Bàsseis-Aups (ara Aups de Provença-Auta) sembla en aquò, mai n'i a que li apóndon d'alhet ò de ceba.
Fin finala, semblarié que li aguèsse ges de separacion franca entre brossin, cachat, cacalha, topinat, estent que la fantasié de cadun dei preparators intra largament en linha de còmpte. La granda diferéncia vèn de la natura dau fromai, de feda ò de cabra, rarament de vaca, e de la longor de la fermentacion. N'i a que prefèron lei fermentacions cortas. N'i a d'autres que prefèron lei fermentacions lòngas que dónon de fromais "que alúmon". Siéu dins lo grope deis "alumats", mai devi confessar que seguissi pas leis ultràs dau brossin que considèron que li a pas de bòn brossin sensa lei pichons vèrmes nomenats "quiquets" que petéjon en espetant, quora metèm pròche labras la lesca de brossin!

Publié avec l'aimable autorisation du journal l'Agriculteur provençal

MALASTRE

Dans les pays qui jouissent du climat méditerranéen, il peut beaucoup neiger en hiver, au dessus de 800m d'altitude; il peut pleuvoir très fort en automne et au printemps; la sécheresse peut être totale en été. Pendant quelques milliers d'années, les hommes ont «fait avec» et ont organisé leur vie en fonction de ce climat... puis ils ont oublié les fondamentaux comme ont dit en sport. Ils ont construit des chalets sur des couloirs d'avalanche en montagne, des maisons, des lycées et des casernes de pompiers en zones inondables, des centaines de piscines dans des pays qui manquent d'eau en été. Et aujourd'hui, ils accusent «el niño», le trou dans la couche d'ozone ou l'accident climatique imprévisible.

Dins lo «Ritme dei sasons» titolat «Deluvi», n° 504 de l'Agriculteur Provençal (julhet 93) escriviéu: «Vodriéu pas jugar lei Cassandra e m'agradarié de mi trompar... Pasmens podèm prevèire que dins leis annadas venentas d'àutrei malastres, d'àutreis escaufèstres semenaràn lo dòu sus lei ribas d'àutrei flumes, valats o rius provençaus». Aquò èra après lei deluvis de Nimes e de Vaison. Sabèm ce qu'es arrivat en setembre passat dins Gard, Eraut, Vauclusa e Bocas de Ròse e podriam encara prevèire d'auvaris grandàs dins la decennia per continuar de jugar lei Cassandra.
Siéu pas d'aquélei que fan portar lo capeu au sudamerican «el niño» o au trauc que lo CO2 cava dins la cocha d'ozòne, meme se aquelei noveutats pòdon aguer una pichòta influéncia sus l'evolucien generala dei climats. De chavanas qu’adúson 600 mm d'aiga dins una soleta nuèch, autant que ce que tomba, drech anar, dins tota una annada, coma es arrivat recentament dins lo ròdol d'Alès, aquò es extraordinari, excepcionau mai pas imprevesible. Lei decidèires e amainatjaires duvrién sacher qu’aquò pòu arrivar.
Ailàs, dempuèi que siam dins «l'èra industriala», leis homo sapiens sapiens (òc, li a doei sapiens dins nòstre nom, n'i a au mens un de tròup!) an oblidat lei fondamentaus, per emplegar un tèrme dau rugbí. Vivèm dins un país de climat mieterranenc, ente leis autons e lei printemps pòdon èstre fòrça banhats, leis ivèrns subrecargats de neu, mai que mai en dessús de 900m d'altituda, e leis estius secs coma de coas de ceba. Aquela realitat qu'aurié degut escapar en degun fuguèt oblidada. D'escòlas, d'immòbles, d'ostaus, de casernas de pompiers siguèron bastits en zònas inondablas. De chalets siguèron aplantats sus lei corridors d'avalancas. De centenats de piscinas siguèron cavadas dins de regiens que màncon d'aiga d'estiu. Lo profiech, la quista dei dardenas, lo cort tèrme dau «jouir sans entraves», son à l'origina de tot aquò.
Es un pauc tard per chanjar quauqua ren. Quàuquei pedaçatges si faràn aquí e ailà. Ren de mai.

Publié avec l'aimable autorisation du journal l'Agriculteur provençal