Dins lo topin, es necite d'apondre quàuquei culhiers d'aigardent (un pareu per cent gramas de fromai) e de mesclar tot aquò. Fau laissar aqueu mesclum un bòn mes dins lo fresc de la cròta. Quora lo brossin es fach, es puèi possible d'apondre de morselons de fromai à l'azard dei subres dei repàs familhaus. Dona un pauc de diversitat.
Mi siéu avisat en parlant ambé diferents afogats d'aquélei fromais fermentats un pauc balès qu'aqueu brossin semblava fòrça au "topinat" dei gents dau relarg gapian e briançonés. Dins aqueu topinat, n'i a que méton un pauc de vin blanc. La "cachat" ò "cacalha" deis amics dei Bàsseis-Aups (ara Aups de Provença-Auta) sembla en aquò, mai n'i a que li apóndon d'alhet ò de ceba.
Fin finala, semblarié que li aguèsse ges de separacion franca entre brossin, cachat, cacalha, topinat, estent que la fantasié de cadun dei preparators intra largament en linha de còmpte. La granda diferéncia vèn de la natura dau fromai, de feda ò de cabra, rarament de vaca, e de la longor de la fermentacion. N'i a que prefèron lei fermentacions cortas. N'i a d'autres que prefèron lei fermentacions lòngas que dónon de fromais "que alúmon". Siéu dins lo grope deis "alumats", mai devi confessar que seguissi pas leis ultràs dau brossin que considèron que li a pas de bòn brossin sensa lei pichons vèrmes nomenats "quiquets" que petéjon en espetant, quora metèm pròche labras la lesca de brossin!
